کمانه کامانا توخونان زامان
طوفانمی هایقیردی، سئلمی چاغلادی؟
بدبخت بیر قریبین آه-آمانیندان
بلکه گؤی کیشنه‌دی، بولود آغلادی؟
دورنامی آیریلدی، اؤز قاتاریندان
اوبامی داغیلدی، علمی تالاندی؟
زامانمی آیریلدی اؤز آخاریندان؟
اصلیمی هیچقیردی، کرممی یاندی؟
کامانین قولوندا یاتان خاللارین
هر بیری قم یوردو، هیجران یوواسی.
بیر قولون اوستونه جمع اولوب مین-مین
نسیمی عصیانی، واقیف نواسی.
اونداکی بو قودرت، بو سیرر نه دیر، نه؟
عذابلا، ذلتله دولودور بو قول.
آیلارا، ایللره، قرینه‌لره
بؤلونن تاریخین یولودور بو قول.
او ائنن، او قالخان سسلر، آوازلار
یاز باشی داغلارین سئلیدیر بلکه؟
کامانین باغریندا آغاران توزلار
یانان آرزولارین کولودور بلکه؟
بو سس، سیناق اوچون - قوسسه‌نین، قمین
کؤنوللر ائوینه سیاهتیمی؟
بو سس، ایلک آتامیز قوجا آدمین
تکلیکدن گیلئیی، شیکایتیمی؟
بلکه سوسدورولان نئچه داهی‌نین
یارالی روحودور بو سس، بو ناله،
دانیشمیر... دوشونور دریندن-درین
سؤزسوز نغمه‌لرله آغلاییر ائله.
هر خالی بنزه‌ییر بیر یانار کؤزه،
قیغیلجیم سیچراییر هر نفه‌سیندن،
بو سسلر دانیشیر بلکه ده بیزه
آتشلر یوردونون فلسفه‌سیندن.
دئییرم، بو سسی دینله‌ینده من،
نییه دقیقه‌لر دؤنوب ایل اولمور؟
بو سسین اودونا، دئییرم، گؤرن
نییه بوتون سسلر یانیب کول اولمور؟
بو سسدن اورگیم اولدو بیر تیکه -
باغریمین باشیندا یارادیر بو سس.
آیین جامالیندا قارا بیر لکه،
لاله‌نین کؤکسونده قارادیر بو سس.
یوخ! کاردیر قولاغی کایناتین دا،
ائشیده بیلسیدی سویا دؤنردی.
سونسوز کایناتین سونسوز قاتیندا
ایشیقسیز اولدوز دا شؤللنردی.
بو آهمی، آمانمی اؤجالیر یئردن،
یئر اؤز فریادینا اؤزو بئزدیمی؟
قوجا فضولی ده بو ناله‌لردن
نئی کیمی بند-بند کسیلمزدیمی؟
بو آغاج پارچاسی یانماییر اؤزو،
آنجاق اود-اوجاقسیز یاندیریر بیزی،
اودون آتشینه اود شان-شان اولور.
بو سسین اودونا آلیشار سو دا؛
آغاج هر آتشه آلیشان اولور،
بو نییه آلیشمیر بئله بیر اودا؟
هابیل! آی اینصافسیز، اورگیمیزی
یاندیریب یاخماقدا قصدین نه دیر، نه؟
نییه یاندیریرسان آتشسیز بیزی؟
بو حاقی کیم وئریب، کیم وئریب سنه؟
+0 به ین
