+0 به ین
بختیاروهابزاده:گوینرتی
*******************
منیم آتام
ئوز قلبینده دفن ائتمشدی
ئوز- ئوزونو
ایچریدن آلیشاردی
ئوز آهیله ، ئوز دردیله
داغیداردی توستوسونو
نه دردینی بیلدیرردی بیركیمسه یه
نه غمینی
ساچلاریندا آغارداردی سیتمینی
هر آجیا قاتلاشاردی
او ، آشاردی
آشیلمایان سیرتی ، داغی
اونون اوچون ان دهشتلی بیر عذابدی
عذابیندان دانیشماغی
بیر پرده یه كئوكلنمیشدی اونون قلبی
آخشامیدا ، سحریده
سئوینجیده ، كئدریده
سالاممادی اونو بیرآن
نه آغریسی نه آجیسی
دایاندیغی مقامیندان .
واخت ئوتدوكجه
ایسته دییی یوئنه سالیب
زمان اونو خمیر كیمی
كئونده له دی
یامان اونو رنده له دی
قیریشلاندی ایللر اونون صیفتینده
زمان اونون قلبینده ده جیغیر آچدی
ئوره ییده یوخالاشدی
بولود كیمی هی بوشالیب
دولدو داشدی
دئیمه دوشر اولدو كیشی
گئوروردوك كی گاه آچیلیر
گاه توتولور
او ، هامیدان سئوگی اومور
قایغی اومور
من ده اونون ئوزو كیمی
خسیس ایدیم
ئوز سئوگیمی بیلدیرمه یه
اونا تسلی وئرمه یه
اوتانیردیم
سیخیلیردیم
ئوره ییمی بیلدیرمه یه
ئوز ئوزومه آر بیلیردیم
منه ائله گلیردیركی
اونو ئوپوپ قوجاقلاماق
یونگول چیخار
چوخ شیت چیخار
او، كاریخار
او ، داریخار
نه بیلئیدیم
ائله بونو گئوزله ییرمیش
بلكه مندن
او ، دولاندا
بولود كیمی توتولاندا
عادیجه بیر ائولاد كیمی
من آتاما
نه قایغیمی بیلدیرردیم
نه سئوگیمی
ئوره یینه باش وورمادیم
قوللوغوندا هئچ دورمادیم
بیلمه دیم بیر ایسته یینی
دیله یینی
ئوز سئوگیمله
ایسسیتمه دیم ئوره یینی
یاشایاركن منیم اونا كیچیك بیر تبسسوموم
سوزولردی ئوره یینه
كئونول آچان بیر نغمه تك.
او اولدومو؟
بوندان سونرا
تآسسوفله آخیتدیغیم
گئوز یاشلاریم
كیمه گرك؟
نه یه گرك
بلی آرتیق كئچمیش اولا
كیم گوروب كی تآسسوفله قلب بوشالا
هایف هایف نیداسینا
چاتیر آنجاق قدرتیمیز
الیمیزده اولان زمان
بیلمه ییریك هئچ بیر شئین قدرینی بیز
ائی ائولادلار
آییق سالماق ایسته ییرم
ایندی سیزی
گیزلتمه یین آتانیزا آنانیزا سئوگینیزی
اولورسونوز ، دومان اولون
سیس اولما یین
نده خسیس اولسانیزدا
سئوگیده خسیس اولمایین
ابدیلیك بیر آغری تك
سونرا سیزی یاندیراجاق
گوینده جك .
تویدان سونرا بو ناغارا
كیمه گرك؟
ایتیردیین دوغمالاری
عزیزلری
قایتاراكی، بیلمه یه جك
قلبینیزده دویونه جك
ئوزونوزون ئوزونوزه آتدیغینیز
تنه داشی،
گئوزونوزده حسرت توزو
اوندان سونرا
كیمه وئره بیلرسینیز
باغرینیزدا سیزیلدایان
قایغی، سئوگی بورجونوزو؟
بختیار وهابزاده:آخی دونیا فیرلانیر
****************************************************
واختین دییرمانیندا داش اریدی قوم اولدو
تاریخه آتدیغیمیز قاییتدی لزوم اولدو
دوننین حقیقتی بو گون ترس یوزوم اولدو
نییه یوزولماسین كی؟آخی دونیا فیرلانیر.
چوخ اُولاقلار ایچینده چوخ اُولاری اُولادیم
آشیب داشان آرزومو من آرتیق جیلوولادیم
من آتامی اُوتموشم منی اوتور اولادیم
بو بئله ده اولمالی آخی دونیا فیرلانیر.
دونن دوز ساندیغیمی بوگون ایری سانیرام
بعضا اُولور ئوزومده ن ئوزوم اَُوغورلانیرام
هر ایل باشقا آرزونون باشینا فیرلانیرام
نییه ده فیرلانماییم؟آخی دونیا فیرلانیر.
چوخ اییلن گورموشم اییلمه ین باشلاری
سولار دورولدو گوُردوك دیبینده كی داشلاری
عنوانینی دییشدی دوننین آلقیشلاری
نییه ده دگیشمه سین؟آخی دونیا فیرلانیر.
نئجه دوُنور بو دوران نئجه دوُنور بو گردیش
تازی لرین اوستونه دوُوشان لاردا گولرمیش!
دونیا بینا اوَلان دان هر شئی دگیشیلرمیش
دگیشمه سین نئیله سین؟آخی دونیا فیرلانیر.
ابدی نی دونیادا من ابدی سانمادیم
بیر آتشه توتوشدوم مین آتشه یانمادیم
بت لار گلدی و گئتدی بیرینه اینانمادیم
نییه اینانمالی یام؟ آخی دونیا فیرلانیر!
فیرلاندیقجا بودونیا یوُخدا دوُنور وار اولور
قورویان چشمه لردن سولار یئنه جار اولور
بو دونیانین خیری ده شرری ده تكرار اولور
نییه تكرار اولماسین؟آخی دونیا فیرلانیر.
مین-مین ایللر بو دونیا بئله جه فیرلانسادا
بیر یووانین بولبولو مین بوداغا قوُنسادا
آیلار ایللر فصیللر بیربیرینی دانسادا
دییشمزدیر عقیده م ؛چوُخدا دونیا فیرلانیر
نه قده ر ایسته ییرسه مین اوُ قده ر فیرلانا
قارشیما گاه شرچیخا ،گاه خییر دیغیرلانا
چرخ فلك ایسته ییر لاپ ترسینه دولانا
عقیده می هئچ نیه دگیشمه رم من یئنه!
**********
ساغلیغیندا قیمت وئرین اینسانلارا( جابر نوروز)
************************
بیر آرزوم وار، آی آداملار، قویون دئییم،
ساغلیغیندا قیمت وئرین اینسانلارا،
یاخشیلارا ساغلیغیندا یاخشی دئیین،
ساغلیغیندا یامان دئیین یامانلارا،
یالنیز، یالنیز، ساغ اولاندا،
هر كس اصیل قیمتینی بیلر اوندا.
بو سؤزلریم دوز اولماسا، تؤهمت ائدین،
سیزدن ریجا ائلییرم میلیون كره،
شاعیرلره ساغلیغیندا هؤرمت ائدین،
ساغلیغیندا هئیكل قویون اؤلمزلره…
گلجیه چوخ دا امید باغلامایین،
سؤزونوزو سونرالارا ساخلامایین.
زهلم گئدیر سونرالاردان،
واختسیز دینن زورنالاردان،
بوشبوغازدان، آوارادان،
تویدان سونرا ناغارادان.
ساغلیغیندا سئویندیرین تمیزلری،
سیز حیاتدا بو آماللا آددیملایین.
ساغلیغیندا ایفشا ائدین خبیثلری،
ساتقینلارا ساغلیغیندا ساتقین دئیین،
تولكو دئیین تولكولره،
آصلان دئیین آصلانلارا.
ساغلیغیندا قیمت وئرین اینسانلارا…
هر كس بیلسین اؤز یئرینی
نئجه ساغدیر،
بو، پیسلرین حیاتینی قیسالتماقدیر
یاخشیلارین حیاتینی اوزاتماقدیر…
بو ندندیر اؤلن كیمی، قلبیمیزده
آداملارا سئوگی، حؤرمت آشیب-داشیر.
اؤلن كیمی یاخشیلار دا یاخشیلاشیر.
یامانلار دا یاخشیلاشیر…
چیركینلر ده تمیز اولور اؤلن كیمی…
یادلار بئله عزیز اولور اؤلن كیمی…
خاطیرلر سؤیله ییریك،
نئكرولوقلار قوللاییریق،
هامیسینا اوجدان توتما یاخشی دئییب
او دونیایا یوللایویریق.
بو گئجیكمیش خئییر-دوعا نیه گرك؟
بوندان مزار بؤیویجك
یا اؤلنمی دیریلجك؟
خوشوم گلمیر
بو كؤهنلمیش عادتلردن،
خوشوم گلمیر…
بو سردابه سئوگیلردن،
حؤرمتلردن خوشوم گلمیر.
ایستمیرم واخت-وعده سیز شؤهرتی من،
بیر آن عؤمرو میلیون قیزیل اؤلوم گله
دییشمَرم…
دیری اوچون ایینه بویدا حؤرمتی من
اؤلو اوچون مین هئیكله دییشمَرم…
دوز دئمَسم، اوندا منی باغیشلایین،
اوز توتارام اوشاقلارا،
قوجالارا، جاوانلارا،
ساغلیغیندا قیمت وئرین اینسانلارا،
یاخشیلارا ساغلیغیندا یاخشی دئیین،
ساغلیغیندا یامان دئیین یامانلارا…