طبیعتین كؤنول آچان

  مین رنگی مین سسی وار

هر كؤنولون مین آرزوسو

مین سسلی نغمه سی وار

بوآرزولار بو نغمه لر

بو سسلر بیر ساز كیمی

منیم سولقون سؤزلریمده

هئچ دیل آچا بیلدیمی؟

حیسسیم درین ، سؤزوم سولقون

قلبیم گنیش ، سینم دار

مندن اول دوغولوبدور

سینمده كی دویغولار

سهو آتیلان آددیملاری

سونرادان آنلایرام

باخیب ویجدان گوزگوسونه

ئوزومو دانلاییرام

سیز ای یانلیش آددیملاریم

منی درده سالدینیز

من سیزینله دویوشدیكجه

گونو گوندن چوخالدینیز

من حق حساب ایسته ییرم

گئجه لر گوندوزومدن

ناراحاتام ناراضیام

عؤمور بویو ئوزمدن

بیزم صنعت دونیاسنین

قیریق تلی سازیام

بیرجه اوندان راضییام كی

ئوزومدن ناراضییام

سامان كیمی دوشوروك یئللره ایتیب گئدیریك

فلك بیزی قووالیر بیزده دورمادان قاچیریق       

بیر آزجا دینجه لیریك یو كلری چاتیب گئدیریك

نسیم كیمی اسریك ،چای – بولاق كیمی آخیریق   

گونش كیمی چیخیریق ،آی كیمی باتیب گئدیریك

قوجالداراق بیزی دنیا ئوزو جاوان یاشاییر          

مین آرزی – حسرتیله وارلیقی آتیب گئدیریك

بو قارقیمیش فلك ایله آلیش – وئریش ائدیریك   

 ده یرلی عومرو ده یره- ده یمزه ساتیب گئدیریك

گوزون یوموب آچیسان ایل دونور اولور بیلدیر    

 سورا اولور اینیش ایل ،ایل لری ئوتوب گئدیریك

  گولن آز اولدو بو گلشنده ،آغلایانلار چوخ         

  گولوش له آغلاماغی بیر-بیره قاتیب گئدیریك

ئوركده بسله ییریك شوخ گؤزللره سئوگی          

 سئویملی سئوگیلینی دردیله آتیب گئدیریك

بیزی هارا آپاریر بو بهار ،پائیز ،یای ،قیش        

 اجل گلنده یوموب گؤزلری یاتیب گئدیریك

گولدورمه سه ن اؤز كؤنلونو، گولمز اوزه آللاه

دونیایا شفقلر كیمی تانریم سپلنمیش،

قلبین گؤزو یانماسا، گؤرونمز گؤزه آللاه.

آللاه! بیلیریك جیسم دئییل، بس ندیر آللاه؟

ان یوكسك اولان حاقدا، حقیقت ده یر آللاه.

دوندونسا تكامل و گؤزللیك قاباغیندا،

درك ائت بو، تعجوبده، بو حئیرتده دیر آللاه.

بیلدیك، بیلیریك، گیزلیدیر اینسان داكی قدرت،

هر كس اونو فهم ائتمه سه ، عاجیزدیر او، البت.

اینسانین ازل بورجودور اینسانلیغا حؤرمت،

اینسانلیغا حؤرمتده، لیاقتده دیر آللاه.

گئرچك ده بودور: گیزلیدیر هر ذره ده وحدت.

بیر ذره ایكن كله قوووشماق اولو نیت.

گؤردوكلریمیز ظاهیردیر، بطنه نفوذ ائت!

باطنده كی ، جؤوهرده كی فیطرتده دیر آللاه.

فیطرت ده یاتیر سؤزده، سؤزون اؤز یوكو فیكریم.

سئچمیش، سئچه جك دایما توكدن توكو فیكریم.

من بیر آغاجام، یارپاغی سؤزلر، كؤكو فیكریم،

سؤزلرده دئییل، سؤزده كی حیكمتده دیر آللاه.

اینسان! تپه دن دیرناغا سن آرزو، دیلكسن،

نفسینده دویومسوز، فقط عشقینده ملكسن.

ظولمون اوزونه حاق دئییلن شیلله نی چكسن،

شیللنده مؤهورلنمیش او غئیرتده دیر آللاه.

جاهیل ائنر آلچاقلیغا، اؤز قلبینه یئنمز،

ویجداندان اگر دؤنسه ده، خیریندن او دؤنمز.

ظولمتده، جهالتده، عداوتده گؤرونمز،