بیر زامانلار منیمچون واقت چاتیشمیردی

واقتی واقتین اؤزوندن

بورج آلماق ایسته ییردیم

ایسته یردیم ، بیر آندا ، بیر ساعاتلیق ایش گؤروم

ایندی ایسه بیلمیرم وقتی نئجه اولدوروم ؟

ایندی باشدان آیاغا ، شیكایتم ، گیلئییم .

وقتیمین قاتیلییم .

وقتی كسیب دوغرایان او قایچی عقربلرین

آغزی یامان كوت اولموش.

چاغلایان چشمه لرین قایناقلاری توتولموش .

منی سیخیر ،

ائله بیل ، بیر قالیب دیر بو دونیا.

منیمچون نئجه ده بوشالیب دیر بو دونیا.

هر شئی منی تئز یورور .

اؤز دونیامی دولدوران بوشلوغون آغیرلیغی

اورییمی دولدورور.

یامان آغیرلاشمیشام .

پیوندیدیم، جیرلاشمیشام.

اؤز بدنیم ، اؤز جانیم دؤنوب منه یوك اولموش

توكنمه ین هوه سیم ،

یاراتماق ائهتیراسیم آرزوما دونوك اولموش ،

سؤز دولاشیر دیلیمده ،

قلم اسیر الیمده

خطییم تانیمماز اولموش.

وقتین آخارینداكی ، كوهنه نیظام پوزولموش .

هئچ اؤزومده بیلمیرم

بو دونیادان نه آلدیم ، بو دونیایا نه وئردیم ،

جورآتیمی ایتیردیم ،

تك احتیاط قازاندیم ،

اومید سوتونلاریندا ، قاتباقات چات قازاندیم

هارای ، قارایا دؤنموش ، بمبیاض آقیم هارای،

هارای الیمدن چیخان ، حلال تورپاغیم هارای !

اوزومه قیریش قاتی ، گؤزومه تور چكیلیر

آرخادا آتمیش ایلیم ، اوندسه ، آللاه بیلیر.

گئجه لریم اوزانیر ، واختین عؤمرو گوده لمیر

یوخوم گلمیر كی، گلمیر ، سحر گلمیر كی ، گلمیر.

نئجه گلسین؟

عؤمرون آخشام چاغیندایام من .

بیر آز دورولماق اوچون

یولدا چوخور آختاران ، بیر بولاننیق سویام من

دوستومدان ، تانیشیمدان بیر تبسوم دیله نن

بیر قریب یولچویام من .

یاشادیغیم ایللری ، الكله دیم بیرده من .

آساندیر بینمه مك دره لری زیروه دن

عؤمرومون زیروسیندن اؤتنلری داشلادیم .

من آرتیق یوخلوغومو ، یاشا ماغا باشلادیم.

بو گونومه باخیرام ، دونه نیمی آنیرام

تئز- تئز هاچالانیرام.

فیكریمه دویون دوشوب

بو گونومه قار- یاغیش ، دونه نیمه گون دوشوب.

بو حالیما نه دئیم ؟

قوجالیغین اؤنونده ، حساب وئریر گنجلییم .

بلكه بودور قوجالیق ؟

قلبین یوخولانماسی؟

سونون ایلكی آنماسی ؟

قوجالیغین اؤنونده گنجلییین اوتانماسی ؟

مئشه ده آغاجلارین تك – تك یارپاق تؤكمه سی؟

یئتكین عاقلین اؤنونده اوره یین دیز  چوكمه سی؟

نییه بو گونه دوشدون *** آی منیم مملكتیم؟

اؤزومه دوشمن اولوب *** آشیب داشان ثروتیم

بیر واقت سنده خانییدیم *** واقتا حوكمرانییدیم

دولتلر قورانییدیم *** ایندی سنه نه اولدو

           آ قوللاشان میللتیم

داشینداندا زر بیتر *** یئددی آرخانا یئتر

دیلنچیدن بئش بتر *** یوخسوللاشان میللتیم

ناموسیلا ، عاریلا *** كئچدییی یوللاریلا

بویوك اوغوللاریلا*** اوغوللاشان میللتیم

ساواش هنرلریله *** قهرمان ارلریلهَ

بویوك ظفرلریله *** ناغیللاشان میللتیم

دمیر قیران دیشیله ***ایگیتلیك وردیشیله

اؤز شانلی كئچمیشیله ***"ساغ اوللاشان میللتیم

بو خالقین اؤز اولادی*** اؤز اؤزونو اوولادی

صبرینی بوخوولادی *** صبیر داشان میللتیم

نئجه دؤزدون بیر بئله *** موصیبته ، موشكوله

چكدییی سیتم ایله *** آ یوللاشان میللتیم

نه گونده سن ، نه گونده *** قور قالمایب، كولونده

غئیرتسیزلر الینده *** بوگون چاشان میللتیم

ایسته ییرم چاشمایا *** دردیله یوللاشمایا

بیر داها قوللاشمایا *** خان اوغلو، خان میللتیم