باهاردا باشلانیریق، قیش گلیر بیتیب گئدیریك    

سامان كیمی دوشوروك یئللره ایتیب گئدیریك

 

فلك بیزی قووالیر بیزده دورمادان قاچیریق       

بیر آزجا دینجه لیریك یو كلری چاتیب گئدیریك

 

نسیم كیمی اسریك ،چای – بولاق كیمی آخیریق   

گونش كیمی چیخیریق ،آی كیمی باتیب گئدیریك

 

قوجالداراق بیزی دنیا ئوزو جاوان یاشاییر          

مین آرزی – حسرتیله وارلیقی آتیب گئدیریك

 

بو قارقیمیش فلك ایله آلیش – وئریش ائدیریك   

 ده یرلی عومرو ده یره- ده یمزه ساتیب گئدیریك

 

گوزون یوموب آچیسان ایل دونور اولور بیلدیر    

 سورا اولور اینیش ایل ،ایل لری ئوتوب گئدیریك

 

  گولن آز اولدو بو گلشنده ،آغلایانلار چوخ         

  گولوش له آغلاماغی بیر-بیره قاتیب گئدیریك

 

ئوركده بسله ییریك شوخ گؤزللره سئوگی          

 سئویملی سئوگیلینی دردیله آتیب گئدیریك

 

بیزی هارا آپاریر بو بهار ،پائیز ،یای ،قیش        

 اجل گلنده یوموب گؤزلری یاتیب گئدیریك

ایدراكدا یول آچمیش گئجه دن گوندوزه آللاه،

گولدورمه سه ن اؤز كؤنلونو، گولمز اوزه آللاه

دونیایا شفقلر كیمی تانریم سپلنمیش،

قلبین گؤزو یانماسا، گؤرونمز گؤزه آللاه.

آللاه! بیلیریك جیسم دئییل، بس ندیر آللاه؟

ان یوكسك اولان حاقدا، حقیقت ده یر آللاه.

دوندونسا تكامل و گؤزللیك قاباغیندا،

درك ائت بو، تعجوبده، بو حئیرتده دیر آللاه.

بیلدیك، بیلیریك، گیزلیدیر اینسان داكی قدرت،

هر كس اونو فهم ائتمه سه ، عاجیزدیر او، البت.

اینسانین ازل بورجودور اینسانلیغا حؤرمت،

اینسانلیغا حؤرمتده، لیاقتده دیر آللاه.

گئرچك ده بودور: گیزلیدیر هر ذره ده وحدت.

بیر ذره ایكن كله قوووشماق اولو نیت.

گؤردوكلریمیز ظاهیردیر، بطنه نفوذ ائت!

باطنده كی ، جؤوهرده كی فیطرتده دیر آللاه.

فیطرت ده یاتیر سؤزده، سؤزون اؤز یوكو فیكریم.

سئچمیش، سئچه جك دایما توكدن توكو فیكریم.

من بیر آغاجام، یارپاغی سؤزلر، كؤكو فیكریم،

سؤزلرده دئییل، سؤزده كی حیكمتده دیر آللاه.

اینسان! تپه دن دیرناغا سن آرزو، دیلكسن،

نفسینده دویومسوز، فقط عشقینده ملكسن.

ظولمون اوزونه حاق دئییلن شیلله نی چكسن،

شیللنده مؤهورلنمیش او غئیرتده دیر آللاه.

جاهیل ائنر آلچاقلیغا، اؤز قلبینه یئنمز،

ویجداندان اگر دؤنسه ده، خیریندن او دؤنمز.

ظولمتده، جهالتده، عداوتده گؤرونمز،

ایلقاردا، صداقتده، محبتده دیر آللاه.

خیر اولا شیطانی گوردوم گئجه

خلقدن ایلوردی شكایت منه

گیچدوق اوتوردوق ایكیمیز كافه ده

حالتینی ایتدی حكایت منه

سویلدی شاعر سنه وار خواهیشیم

چوخ عرفائیله اولوب گردیشیم

عفو ایله بیر دفعه دوشوبدور ایشیم

من یازیقام ایله حمایت منه

آخ نیه خلق ایلوری لعنت منه

آدمی خلق ایتدی خدای كریم

ایلمدیم سجده من اولدوم رجیم

سوز اوزانیب ایندی اولوب بیر سیجیم

دائم ائدیر حمله بو ملت منه

آخ نیه خلق ایلوری لعنت منه

منكه بولاردان جانیم ال چكمیشم

شیطنتین بوخچاسینی بوكموشم

بیرجه كیمین بالدیزینی سی.....م

بیر بله ایلول‌له اذیت منه

آخ نیه خلق ایلوری لعنت منه

رشوه‌نی مین مین قاهاروب خان یسین

نفع ربانی حاجی ترخان یسین

تهمتینی بس نیه شیطان یسین

داغدان آغیر گلدی بو منت منه

آخ نیه خلق ایلوری لعنت منه

آدمه من ایلمدیم سجده گر

واریدی صلبنده سنون تك بشر

ایندی اولوبدور هامی بیر پارچا شر

قالدی یالاندان بو اهانت منه

آخ نیه خلق ایلوری لعنت منه

اوستادی خلق ایندی تاپولماز ناشی

چیخمیا تا مكر و حیل‌دن باشی

هر كس اولوبدور اوزی شیطان باشی

هیچ ایشه ورمول‌له دخالت منه

آخ نیه خلق ایلوری لعنت منه

تابع نفس اول می‌سوز ای فكری خام

مین جور اویوندان چیخی‌سوز صبح و شام

مفته منی متهم ایلور عوام

قویمامی‌سوز ذره جه فرصت منه

آخ نیه خلق ایلوری لعنت منه

كبلایی آرتوق آلیر اسگیك ساتور

گونده ساری یاغه نباتی قاتور

پیس پیس اوتانمور ایله قالخور یاتور

لعن ایدیر از روی حماقت منه

آخ نیه خلق ایلوری لعنت منه

پیس بولوسوز گر منی ای زنجلب

آخ نه دوشوب‌سوز دالیما داوطلب

سیز كی تانیر سیز منی یاللعجب

بس نیه ایلورسوز اطاعت منه

آخ نیه خلق ایلوری لعنت منه

من بابا پیغمبریدیم بیر زمان

طاعت ایدردی منه جان ابن جان

رتبه می آرتیردی خدای جهان

ویردی اوز عرشینده سكونت منه

آخ نیه خلق ایلوری لعنت منه

گوی ده نه اجالیله اهل سما

صف چكوب ایلردی منه اقتدا

آخری بیر كلمه‌نین اوسته خدا

ایلدی تنبیه و سیاست منه

آخ نیه خلق ایلوری لعنت منه

ایتدی تكبر منی خار و ذلیل

چیخدی الیمدن او گوزل سلسبیل

طولی چكوب سجده‌مین اوغلوم مین ایل

حق اوزی ورمیشدی فضیلت منه

آخ نیه خلق ایلوری لعنت منه

سیز ایله بد ذات‌سوز ای بدخصال

آدمی خلق ایتدی حق ذوالجلال

اولدی وجودی منه وزر و وبال

اولدی اونون خلقتی نقمت منه

آخ نیه خلق ایلوری لعنت منه

سجده‌نی من ایلمدیم آدمه

سیز ایدی‌سوز سجده بنی آدمه

آدیوز اسلامدی با این همه

سیز نه بشرسوز گنه رحمت منه

آخ نیه خلق ایلوری لعنت منه

سیز ده هله یوخدی او شان و مقام

خلقه انا الله دیورسوز ای عوام

تخت ریاستدن اوتور صبح و شام

اللشوب ایلیرسوز عداوت منه

آخ نیه خلق ایلوری لعنت منه

لاپ گده بیر یول یمی‌سوز غیرتی

عصمتی حیثیتی شخصیتی

بیر بیره قاتدوز كیشینی عورتی

دگسین اوغول سیزدكی غیرت منه

آخ نیه خلق ایلوری لعنت منه

هاردا دیدیم من بو خانیم قیزلارا

خوش بزنه وسمه چكه فر قویا

مرثیه لرده گتوره مین ادا

بوشلادا بسدور بو لجاجت منه

آخ نیه خلق ایلوری لعنت منه

آخ نه دوشوبسوز دالیما عمر و زید

ایستمیرم من بابا سیز تك مرید

آی گده لاپ سیز منی ایتدوز یزید

سیزدن اوغول چیخمادی امت منه

آخ نیه خلق ایلوری لعنت منه

جامعه ده بللی دیور مسلك‌وز

مذهب اسلامده یوخ مدرك‌وز

یوز منی وطی ایلی‌سوز هر تك تك‌وز

ایتمی‌سوز هر حیلده سبقت منه

آخ نیه خلق ایلوری لعنت منه

نفسیوه تنبیه ایله اوغلوم بالا

من دیورم بانقانی آل قات بالا

دوش قاباغا هر نه گلور قارمالا

باس اوروجی ایله شماتت منه

آخ نیه خلق ایلوری لعنت منه

من هاچان ایتدیم بو قدر انقلاب

هاردا قمار اوینادیم ایچدیم شراب

مفتضح ایتدوز منی ای بی‌حجاب

وردوز عجب بوللی خصارت منه

آخ نیه خلق ایلوری لعنت منه

گه منه ملعون دیوسوز گه شرور

عكسیمی گه شل چكی‌سوز گاهی كور

گاهی گورورسوز یوخودا مثل حور

هیچ یاراشور گور بو شباهت منه

آخ نیه خلق ایلوری لعنت منه

تاپ او كریمی‌نی سحر ای پسر

سویله بوگفتاری اونا سر بسر

منع ایله‌سین خلقی او نیكو سیر

ایلمسون لعن جماعت منه

آخ نیه خلق ایلوری لعنت منه

بعضی صفت‌لر گورورم آشكار

هیچ بیری منده یوخیدی سیزده وار

قانمامی‌سوز غیرت و ناموس و عار

پیس پیس ایدیرسوز هله لعنت منه

آخ نیه خلق ایلوری لعنت منه

منی اینجیدیرلرهی اینجیدیرلر، بعضن قصد ایله،  

  ائرته سی هر شئیی اونودورام من.  

  گیریمه دوشنده ظالیمه بئله  

  ظولم ائدیب، كام آلماق گلمیر الیمدن.  

   

  آنا، قودوزلاشیر حیات، ایل به ایل،  

  دالاییر پوچ اولان اومیدلریمی.  

  نییه ایستی دئییل، مهریبان دئییل  

  بو آمانسیز حیات قوجاغین كیمی؟..  

  هارداسان، آی آنا، بیر گل، من یئنه  

  بلالی باشیمی قویوم دیزینه.  

  منه ناغیل دانیش، دایانسین آنلار،  

  گؤروم، ناغیلداكی او قهرمانلار  

  جوتباشلی دئولری نه تهر ییخیر،  

  نه تهر گیزله نیب، طیلسیمدن چیخیر.  

   

  بیر دانیش، هاردادیر، گؤروم سعادت؟  

  بیزیم یوردوموزا او نییه گلمز؟  

  دانیش، دانیش گؤروم، ملیك محممد  

  ظولمتدن ایشیغا نئجه چیخدی بس؟  

   

  دانیشما، آی آنام، دانیشما، كیری،  

  بئینیمه باتماییر بو افسانه لر.  

  دیولر گؤرموشم كی، ناغیل دیولری،  

  اونلارین یانیندا تویوغا بنزر.  

   

  نادانلار گؤرموشم، اؤز یولونداكی  

  دیكه ائنیش دئییر، دوزه دیك دئییر.  

  تولكولر گؤرموشم، اؤز قولونداكی  

  دمیر زنجیرلره بیلرزیك دئییر.  

   

  آتاسینی سؤین، یادا باش اَین   

  رهبرلر گؤرموشم، غدار، آمانسیز.  

  تیكانا گول دئین، گوله كول دئین  

  قاریلار گؤرموشم دینسیز، ایمانسیز.  

   

  قولدورلار گؤرموشم، اؤزگه یئر دئییل،  

  یوردونو تالاییب، آسوده یاتمیش.  

  تاجیرلر گؤرموشم، سیم وزر دئییل،  

   " مالادئس "  سؤزونه وطنی ساتمیش.  

   

  دونیانی بیلندن، دویاندان بری  

  منیم گؤزلریمدن دوشوب حیات دا.  

  ناغیلدا گؤردویوم قورخونج شئیلری،  

  حیاتدا گؤرموشم، آنام، حیاتدا.  

 

"مالادئس: روسجا آفرین دئمكدیر"

آنام اولسان بئله، آی آنام، خئیلی،  

  سندن گیلئیلییم، سندن گیلئیلی...  

  سن دویماق، دوشونمك اؤیرتدین منه،  

  دویوب-دوشونمكدن آزاد اولایدیم.  

  دانیشماق اؤیرتدین سن اؤز كؤرپنه  

  نولا، من آنادان لال دوغولایدیم.  

   

  دیلینی بیر ایله اؤیرندیم... ناحاق!..  

  اؤز دیلیم اؤزومه كسیلیب یاغی.  

  بوتون عؤمروم بویو چالیشدیم، آنجاق  

  اؤیرنه بیلمه دیم دانیشماماغی...  

  باشیما بلادیر منیم اؤز دیلیم،  

  دنیزم، اوزومه دوروب ساحیلیم.  

   

  یئریمك اؤیرتدین توتوب الیمدن،  

  دولاشدیم آرانی، دولاشدیم داغی.  

  بالانا یئریمك اؤیره دینجه سن،  

  گرك اؤیره دئیدین ییخیلماماغی...  

   

  فیكیرلر ییغیلیر بئینیمده قات-قات،  

  جاوابلار قورخولو، سوواللار-یاساق.  

  حیاتی قانانا اؤگئیدیر حیات،  

  اونو قانمایانا دوغمادیر آنجاق.