زامان آغلاتدی منی

آغلامازدیم زامان آغلاتدی منی

دوز یولوندان آزان آغلاتدی منی

گوردوم حسرتدی همالر سوموگه

ایشله ییر شاخدا سوموكدن ایلیگه

دوزوموزده اییلیر ایری لیگه

قالدی قانماز قانان آغلاتدی منی

آغلامازدیم زامان آغلاتدی منی

تك صبیر گلدی دئدیم ایش دوزه لر

قار گئدر، بوز ارییر یازدا گلر

نه بیلیم یازدا بوران باغری ده لر

یوخاچیخمیش گومان آغلاتدی منی

آغلامازدیم زامان آغلاتدی منی

دئدیلر بیر گون اولار ساز حالیمیز

قیتدیق اولسا واریمیز یاغ بالیمیز

ایندی كی اون تك اولوب ساققالیمیز

بو یالان سوز یامان آغلاتدی منی

آغلامازدیم زامان آغلاتدی منی

ظن ائدیردیم آغیر اولسا یارالار

یارالار آغریسین آنجاق یار آلار

نه بیلیدیم اوره گی یار یارالار

بیلمه مز لیكدی، قان آغلاتدی منی

آغلامازدیم زامان آغلاتدی منی

اره لر توشدو كه جنگل جانینا

تولكی لر تور توخودو اصلانینا

طرلانی اووچی باتیر جاق قانینا

اوخدان آرتیق كامان آغلاتدی منی

آغلامازدیم زامان آغلاتدی منی

اری مز قالدی بیینده بوزوموز

گویده سایریشمادی بخت اولدوزوموز

نه قویون قالدی نه املیك قوزوموز

قوردا بنذر چوبان آغلاتدی منی

آغلامازدیم زامان آغلاتدی منی

من دئدیم باغلاسا یادلار قولومو

دایاقیم وار قورییا ساغ سولومو

قوپدی بیر چن كه ایتیردیم یولومو

داغا باخدیم دومان آغلاتدی منی

آغلامازدیم زامان آغلاتدی منی

وای بیزه اولدی پوزولماز یازیمیز

مضراب اود توتدی قیریلدی سازیمیز

قالدی قیشلانمادا عاصم یازیمیز

یازی گول سوز یازان آغلاتدی منی

آغلامازدیم زامان آغلاتدی منی

یامان درددیر ،

اؤزگه سینه یاماق اولماق

یامان دردیر ،

آزادلیقین حسرتینه

داماق اولماق

یامان دردیر،

گوزون اولا

آمما گؤره بیلمه یه سن

یامان دردیر ،

الین اولا،

ائوینده كی زیر- زیبیلی 

سن سوپوره بیلمه یه سن

یامان دردیر ،

دیلین اولا ،

نه دانیشب نه دینه سن

یامان درددیر،

عاغلین اولا ،

اؤزگه سینین عاغلی ایله

دوشونه سن

......

بیر وقت، گزه‌نده بو گؤزه‌ل یار خیابان‌دا

بیر سَروِ خُرامان‌ایدی، سیّار خیابان‌دا

 ایندی اگیلیب قامتی من تك، گؤزو گؤرمور

ال‌ده عصا، گزمك‌ده‌دیر آخسار خیابان‌دا

 اوْندا دوْلاشاردیق كی، گؤره‌ك «تئریا» هایاندا؟

ایندی باخیریق، هاردا «مطب» وار خیابان‌دا؟!

 چكدیك خیابان‌لاركی، جوان‌لار ائده جؤولان

جؤولان ائله‌ییر ایندی سیچان‌لار خیابان‌دا

باخ توستویه، توْز- توْرپاغا، هم سس- كویو دینله

مین‌لرله ماشین وار بو كیچیك – دار خیابان‌دا

 لندن- نیویورك، اللی دنه «بورس» ساتانمیر

میلیون‌لا گزیر بوردا خریدار خیابان‌دا

 «بورس» آل- وئرینی بوْشلا، «سهام» دان‌دا گؤزون اؤرت

عرضه ائله میلیون قوطو سیگار خیابان‌دا

 كئچدی اوْ زمان‌كی، لوْطولار بوردا گزه‌ردی

جؤولان ائدیری ایندی گؤزه‌ل یار خیابان‌دا

 دلبر، یانینا خارجی- خیردا «تولا» سالمیش

نازلا دوْلانیر، ال‌ده‌ده اوْوسار، خیابان‌دا

 ایت‌لرده اوْلوب قرتی، بالا قوْلچاغا بنزه‌ر

گاهدان‌دا چكیر توك‌لره سشوار خیابان‌دا

 بیردن گؤروروك جدّی- درین بحث‌لر اوْلدو

چوْخ معنالی، حكمت‌لی‌دیر افكار خیابان‌دا

 بیر عدّه سئویر یاز- یایی، مانتو یاشیل اوْلسون

بعضی سؤله‌ییر: «چك اوجا دیوار خیابان‌دا»!

 یوزمین یولون اوْلسا، یانینا سال ایكی یوز «گارد»

چون‌كی، موْتور اوستده گزیر اشرار خیابان‌دا

 آچمیش بساطین دستفروش‌لار، نئچه مین جور

وار فرش ساتان، فالچی، هم عطار خیابان‌دا

 «آرش»! سؤزو كس، تئزجه اكیل، اوْرتادا دورما

گؤردون یاخانی توتدو طلبكار خیابان‌دا