+0 به ین
ایللری دن کیمی زامان اوتدو
اوجاق هئیدن دوشوب ، کؤز قارالیبدیر
عؤمرون یایی کئچدی باهاری(باهان=اویرنمک) اؤتدو
عؤمرون ایضطیرابی قیشی قالیبدیر
******************
اونودا بیلمیرم قالیب – قالمایب ؟
بلکه کؤجه جه یم قیشا چاتمامیش
آمما حیات عشقی هئچ آزالمایب
کؤچمک ایسته میرم قیشی دادمامیش...
**************
فصیللر گؤزلی :باهاردی ، یایدی
قیش: عذاب فصلیدیر...
باری: شاختا قار..
عؤمرون دادی دوزو ، آرخادا قالدی
اؤنده عذابیم وار ایظطیرابیم وار
****************
واخت بویو کیچتدی ، باشی بویوتدو
زامان وئردیینی بیربه بیر آلار
باشیمین اوستوندن اوتدو نه اوتدو
ایللرین کوچ ائدن صفی دورنالار
***************
گؤزومه تور گلیر بئله دی گردیش
باشیما گلنلر قدردن گلیب
دئمیرم گؤزلریم توران گتیرمیش
دئیرم هاوایا دومان ، چن گلیب
*************
عاغلیملا هر شئیی گؤرورم نه غم
باخمادان سئچیرم قارادان آغی
باخیرام ، یاخینی گؤره بیلمیرم
اوزاغی گؤرورم آنجاق اوزاغی
****************
دمدن دوشدویومو بیلدیرمه سمده
زامان اؤز ایشینده ، اؤز ایشینده دیر
"حیس ائده بیلمیرم" یاشی دئسمده
بیلیرم یاش نه دیر،عؤمور- گون ندیر؟
*******************
متیم اؤز مجلیسیم ، منیم اؤز یئریم
چیلغین دویغولاردان یاشیم چکیندی
گؤزل قیز گؤرنده یانان گؤزلریم
اوغلوما گؤز آلتی آختاریر ایندی
********************
بس بو نه سئودادیر، بس بو نه هوس ؟
اؤلومو اؤزومدن گئن سایرام من
جاوانلار یانیندا بو ندندی من
یاشیمی دئمه یه اوتانیرام من ؟
******************
اؤرک بو دونیادان کوسدو ، اینجیدی
یاشیمی بیریسی سالیرکن یادا
دونیا اوشاق ایدی ، دونیا گنج ایدی
منیمله برابر قوجالیر اودا
****************
آیلاری ایللری چکدیم تاریما
یوخسا بئزدیرمیشم قوجا دونیانی ؟
یاشیمی آرتیریب همیاشلاریما
اوشاق تک باخدیغیم گونلریم هانی ؟
********************
اؤزومدن ایره لی باخیردیم اوندا
ایندی آرخادادیر قصدیم گومانیم
دومانلی خاطیره یاغیشلاریندا
ایسلانیر اوره ییم ، ایسلانیر جانیم
*******************
کدرلی آنلاردا آنیرام هردن
کیملر گلیب کئچدی دونیادان کیملر؟
بو نیه بئله دیر؟ یاشلاشدیقجا من
اویانیر روحومدا چوخ – چوخ قدیملر..
************************
آتام ، بابام گیریر یوخوما تئز- تئز
آرادیقجا رنگبرنگ عمللریمی
یوخومدا آتاملا آتام کیمی یوخ
ایندی دانیشیرام همیاشیم کیمی
********************
ندیر بو تلاشلار، هئچ سورما، کؤنلوم
اوزمه سین بو یولدا کدر ، غم سنی
ایتن گنجلیینی آختارما کؤنلوم
آختارسان قورخورام ایتیرم سنی
*******************
تزه پوهره لره او مغرور گونش
وئریب ایستیسینی غروبا ائندی
منیم ایتیردییم او اود او آتش
اوغلومون گؤزونده آلیشیر ایندی
**********************
دونیا تزه لنسین ! گؤروشوب قیشلا
بوحاققی هم بیلن ، هم دانان منم
کؤهنه دونیامیزا تزه باخیشلا
اؤولادلار گوزوندن بویلانان منم
آردینی اوخو