گزیده ی تاریخ و ادبیات آذربایجانی - AZƏRBAYCAN TARİX VƏ ƏDƏBİYYATINDAN SEÇİLMİŞLƏR

آذربایجان تاریخ و ادبیاتیندان ، سئچیلمیشلر

محمد تقی زهتابی

+0 به ین
وئریب سعادتیمی، آلمیشام فلاكتی من

 بوتون جهانه دییشمم، اینان بو حالتی من


همیشه لای‌لالاریندان، یادیمدادیر آنامین

 كی ساتمایام قیزیلا، خلقله - شرافتی من




عاصم اردبیلی : یارالی دورنا/گؤندرن: آیهان

+0 به ین
سیندیردی سکوتی گولله نین سسی

قالدی قاطاریندان آرالی دورنا

اووچو تفنگینی سالدی چیینینه

یئرده قاناد سردی یارالی دورنا

قالدی قاطاریندان آرالی دورنا
******************

سوروندو اوزونو بیریانا چکسین

اووچونون الیندن قاچماق ایسته دی

قانلی قانادینا حسرتله باخیب

تکجه اون آددیملیق اوچماق ایسته دی

اووچونون الیندن قاچماق ایسته دی
************************

قاناد اوز بورجونو چاتدیردی سونا

ایندیسه قوش چیغاز نئیله دی گورک

قاباخدا اوچوروم دالیندا اووچو

بیرینین ذاتی داش بیری داش اوره ک

ایندیسه قوش چیغاز نئیله دی گورک
***********************

اوچورومدان اوزون توللادی چایا

اووچونون اوشوتمه سالدی جانینا

شرفلی اوءلومو خوشلادی دورنا

حورمت باغیشلادی آخان قانینا

اووچونون اوشوتمه سالدی جانینا
***********************

نازیلان گلمیشدی گئتدی یازیلان

قالدی قاطاریندان آرالی دورنا

هاردان گلمه یینی کیمسه بیلمه دی

سئله قسمت اولدو یارالی دورنا

قالدی قاطاریندان آرالی دورنا
***********************

آنجاق او دورنادا گلین سارا تک

چاغلاییب آغلایان سئلله ره چاتدی

بیر سس سیز اوءلومدن قوپان های هارای

یئلله رین الی له ائلله ره چاتدی

چاغلاییب آغلایان سئلله ره چاتدی



آردینی اوخو

بختیار وهابزاده : سئوال وارسا، جواب وار

+0 به ین

 من اوزگوچو دئیلم ، نه ایشیم وار درینده

من اوزورم دنیزین آنجاق دایاز یئرینده

دنیزین درینلییی واهیمیله دولودور 

تكجه بونو بیلیرم : درینلیك قورخولودور

من قورخورام كؤنلومون ایچینه باش وورماغا

اوردا دونوب داشلاشان لایلاری قالدیرماغا

قالدیردینمی بیر لایی، لای اوستوندن لای گلیر

سوكوت لایی پوزولسا دالینجا هارای گلیر

هارای ، درینلیكده كی ، مین -  مین مجهولدان هارای

آنا یولدان آیریلان جیغیردان ، یولدان هارای !

بیر گولو درمك اوچون مین عذابا دؤزركن

قارشیندا گول یئرینه دیككیلن كولدان هارای !

قورخورام، خیالیم ، منی هر گون آلدادیب

سرخوش ائدن مئییندن

بیرده ... كونول  دریامین دیبسیز درینلییندن .

نه دئمكدیر دویغومون بیرجه آنین ایچینده

یانیب جیلالانماسی ؟

صاباحكی فاجعه نین بو گون هاردانسا سیزیب

اوره ییمه دانماسی ؟

 

نه دامدی ، نییه دامدی؟

نییه آغلاداممادی ، آنجاق اوره یه دامدی؟

بیز داممانی بیلیریك دامدیراندان خبرسیز

گاه یانیب ، گاه سؤنوروك ، یاندیراندان خبرسیز

دامان كی ، معلوم ایدی

بس دامدیران كیم ایدی؟

نییه خبردار ائدیر ، طالع منی اؤنجه دن؟

 

یوخودا گوردویوموز ، گئرچك اولور ائرته سی،

بو گونون اولایلاری ، اونودولور ائرته سی

قیرخ ایل اول اولانلار ، ائله بیل بایاق اولموش!

نییه اوزاقلار یاخین ، یاخینلار اوزاق اولموش؟

نه دئمكدیر بو حاللار...

منی حئیرتلندیرن ، بو جوابسیز سواللار؟

هیكللره دوندریب هر دویغومو ، حیسسسمی

محراب كیمی ، بت كیمی

اونلارین قارشسیندا  من دونماق ایسته ییرم ،

هر بیرینه الیمله توخونماق ایسته ییرم .

ائشیتمك ایسته ییرم فریادینی ، آهینی

من گؤرمك ایسته ییرم بیر دویغودان گؤیرن

اونون دورد جیناهینی.

دونیانین بیر سیغالی ، اما بول  سیلله سی وار،

عؤمرون  اوچ پیلله  سی وار :

دونن – گوناه

بوگون – درد

گله جكسه – اؤلومدور

اوچو بیرگه – اینسانین اؤز اؤزونه وئردییی

ایضطیرابدیر ، ظولومدور .

گوناه – كؤهنه گوناهدیر ، اونودوروق آمما بیز

گونا هكاردیر جدیمیز ،

او زماندان بولانیب هئی آخسادا  چوخ سولار ،

تانرینین جننتیندن جددیمیزی قودولار.

حاكیم اولا بیلمیریك نفسیمیزه او گوندن ،

خیلاص اولا بیلمیریك شیطانین  حیله سیندن

بیز ال آچیب درگاها –

تزه آدلار وئریریك  بو گون كؤهنه گوناها...

تانری هر شئیدن اول تورپاغی یاراتدی كی ،

یاراتماق ایسته دییی ، اینسان اوچون یئم اولسون ،

طبیعتده بیر آهنگ تارازلیق ، نیظام اولسون ،

آمما اینسان اؤلونجه

بو دفعه ده او اؤزو  تورپاق اوچون یئم اولدو.

بو ، اونا تسلیم ایكن ،

او ، بونا تسلیم اولدو.

سن ائی بو نیظامدا كی ایلك قایدانی پوزانیم ،

سن ائی واختین الیله بیزه طالع یازانیم ،

نه دئمكدیر ، اؤزون دئ ،

یئمین دونوب یئنیدن یئمینه یئم اولماسی ؟

حاكیمین قول اولماسی ، قولون حاكیم اولماسی ؟

 

بیرجه گونون ایچینده ، مین بیر حالا دوشمه ییم –

اؤزگه سیله دیل تاپیب ، اؤزومله دؤیوشمه ییم

نه دئمكدیر ایلاهی ؟

من كی ، عاجیز بندنم ،

بو دویغو لار الینده

اوزو قارا ،

دیلی لال

گؤزو كور شرمنده نم .

منه وئردیین عاغیل ، نییه گلمیر كاریما ؟

او، جواب تاپا بیلمه ییر مین – مین سؤاللاریما؟

اؤزون دئ ، منیم عاقلیم عاجیز ایسه بوقدر،

هاردان دوغور بس سنین سیررینه ال اوزالدان ،

بو جاوابسیز سؤاللار؟

عینی گونده دوغولور هر قیفیلا بیر آچار،

قیفیل وارسا ، آچار وار ،

سؤال وارسا ، جاواب وار

 



بختیار وهابزاده: وقت

+0 به ین

وقت منی پروانه تك باشینا دولاندیریر

دونن قانمادیغیمی بوگون منه قاندیریر

من اؤز آزادلیغیما، تانری دئدیم ، حق دئدیم

بیر حؤكمه بیر فرمانا، من باشیمی ایمه دیم

كامیل اوخو



آردینی اوخو