سئوه رک سنی ،

اوستونه تحقیردن اود اله دیم من .

اؤزومون ایللربویو اومیدلریمی

آرزومو، حیسیمی گوللله دیم من .

ایندی من اؤزومو داندیم بوسبوتون

باشقا جور باخیرام ایندی عالمه

منیم صؤحبتیمین منیم سؤزومون

دادی دا ، دوزو دا سنسنمیش دئمه ..

سؤنذو سینمده کی او اود او اوجاق ،

بوش بیر قووق کیمی هاوادایام من .

اینسان نفسیندن اوزاق ، چوخ اوزاق

وولکانی(آتشفشانی) سویویان بیر آدایام من .

عاغلیم اورییمه نئجه قییبدیر،

من اؤزوم اؤزومه بیر یوک اولموشام .

سینمده اؤره ییم بوز باغلاییبدیر

بوداغی بودانمیش کؤتوک اولموشام.

نه چیچک اوخشاییر ، نه اولدوز منی

فیکیرلر داغیلمیش ، خیاللار انمیش .

یئرینده ، گویونده گؤزللیینی ،

سنین گؤزلرینله من گؤرورممیش،

گئجه لر دوزولور ساپا فیکیرلر،

یورغانیم داش اولور ، دؤشییم تیکان

سحرلر گؤزومو آچیب دونیایا

قالخماق ایسته میرم هئچ یاتاغیمدان

یاتماق اایسته ییرم ، یاتماق ، باخ ائله

گؤزومو زیلله ییب تاوانا باخیم

من هانمسی آرزونون تلاطومو یله

اینیمی گئینیب قاپیدان چیخیم ؟

قاچیرام - قاچیرام سحرلر منه

بیر دئین اولماسین صاباحین خئیر

آخی ، صاباحینی ایتیرن یازیق ،

صاباحدان شر اومور ، خئیر ایسته میر

ائله بیل دایاندی یولو عؤمرومون

بونا جان آتیردیم... بس آرزونییدی؟

حسرتله ، ووصاللا دولو عؤمرومون،

معناسی ایتینجه ، اؤزو ایته ایدی...

ایندی یولوم دوزدور ... نه داغ ، نه دره ..،

بو باشدان باخاندا ، او باش گؤرونور .

کاش قیسمت اولایدی ایسته ینلره

ائنیشسیز، یوخوشسوز، دالغاسیزعؤمور..

حیات چیرپینتیمیش ، اونون هر گؤنو،

ایللرین یوکونو چکسه، نه دردیم ...

من قورقود اولسایدیم ، سئوگی سؤزونو

یاشاماق سؤزونه جیناس ائدردیم .