+0 به ین
شعر استاد شهریار در استقبال دیدار "رستم علییف" ادیب جمهوری آذربایجان
بیر قرن ده قارداشدان اوزاخلاشماق اولورموش؟
قارداش دئیه، بیرعومر، سوراغلاشماق اولورموش؟
بیردنده، بوقارداشلا، قوجاقلاشماق اولورموش؟
بونلار بئله کی عرض ائله دیم، گلدی و اولدی
من هر نه محال فرض ائله دیم، گلدی و اولدی
بیز آیریلالی قرن ایدی، قارداشلاریمیزدان
لش لر کیمی آیری دوشه لی باشلاریمیزدان
اوزموش الی قافقازی قارینداشلاریمیزدان
گؤر من نه حال اوٌلام بئله دستانی گؤرنده
بیردنده علی یف کیمی اصلانی گؤرنده
قارداش! گؤزوم آختارمادا قوی بیرسنی تاپسین
عشقیم، طلیسیم داغلاری فرهاد کیمی چاپسین
دشمن واریسه امجگینی، تندیره تاپسین
حسرت قالالی بیز سیزه، بیر قرن یاریم دیر
آغلاگؤزومون شاهدی، شعریم، سه تاریم دیر
اووردش «فاش آلان حلمه» گؤزو فاشدان آییرمیش
جلاد قمه سیله، بدنی باشدان آییرمیش
جاندان جیگری، قارداشی-قارداشدان آییرمیش
بیر ملته دنیا بوبی، بیر فاجعه دوغموش
بیز ائللرین او قهرمان احساسینی بوغموش
یاتسین یاوا گؤزلر، هله لیک بختی اویاندیم
ائل - آرخاما چاتیقدا بوگون آرزیما چاتدیم
قارداش سنی تاپدیقدا، غمی غصه نی آتدیم
سانکی باکی نی، گنجه نی وئردین منه قادراش
تاپدیم ائلیمی - آرخامی، قوربان سنه قارداش
سن تحویل آلیرسان منی، قارداش دا سانیرسان
مین لر یاد ایچینده منی گؤرجکده تانیرسان
قلبیمده، دیلیمده نه سؤزوم وارسا قانیرسان
«رستم» باکیدان سویته منه، جان سنه قوربان
تبریز سنه لایق نه؟ تهران سنه قوربان!
قارداش یئنه سنسن کی دالیمدا دایانیب سان
قارداش یاتا بیلمزسه، اویوبکن، اویانیب سان
من هر اودا یانمیشسام، اونا سن ده یانیب سان
یاد قارداش اولانماز بیزه، قارداش دا یاد اولماز
قلبیم سن ایله شاد اولی، سن سیزده شاد اولماز
سیزلرجه بؤیوک انقلابیز، خلقی آییتدی
چاپقین مال اولان، مال - داوار اولسون دافاییتدی
آمما بیزیم انسانلاریمیز گئتدی کی گئتدی!
قافقاز قاییدیب دؤنمه دی ئوز کژ مداریندان
قسمت هله یوخ شهریارا «بختیار» یندان
«رستم»، سنه قوربان! بو سلامی گؤتوررسن
او قهرمان ائللرده گزر کن، یئتیره رسن
اوردان دا گلنده، بیزه شادلیق گتیره رسن
دئینه «دومرول» بورجینی دوشمان ییخا بیلمز
قارداش نه قدر یادلاشا، باددان چیخا بیلمز
سارقیندی اوسوسنلره سونبوللره کؤنلوم
بولبول کیمی قان دیر، او قبزیل گوللره کؤنلوم
«واحد» لره «قابیل» لره «بولبول» لره کؤنلوم
شاعر اولالی بور جلودی «صابر» لره روحوم
«ووروغون» دی «سلیمان» کیمی ساحرلره روحوم
«راحیم» لی «سلیمان» لی گؤوروم «بختیار» اولسون
«گولگون» باجیم «آذر» قادینی برقرار اولسون
«عثمان» - «نبی» - «کورچایلی» - «رسول» - «توده» وار اولسون
فرصتده «سهند» ایله سیزه گول سپه ریک بیز
هر گؤزسیزی گورموشسه، او گؤزدن أوپه ریک بیز
عشقینده کؤنول گؤز یولاتیکمیش، یاری گؤزلر
کونلوم یار ایتیرمیش، آرایوب - آختاری گؤزلر
دیل صبر ائله ییب دینمه سه ده، یالواری گؤزلر
عاشق گؤزودیر، چشمه زمزم ده دئیه رلر
هجران اودودیر، ناز جهنم ده دئیه رلر
بیر گون اولی کی، فاتحه بیز ساغ - سولاوئرریک
دنیا هامی بیر ملت اولوب قول - قولاوئرریک
دشمن ده محبت تاپا، بیزلر یولاوئرریک
قارداش اوزونه حسرت اولوب چکمم او گون آه
خلقی اودا یاندیرماغا، بیر تک قالی آللاه
1349