+0 به ین
داش باریلار، قالالار،
برجلر دورور یان - یانا
اونلار كشیك چكیرلر
سولطانین سرایینا
توپلاردا توشلانیبدیر
داش باریدان (قالا سنگری)شهره
توپلار بورا گله لی
آتیلیبمبی بیر كره؟
یوخ! نییه ده آتیلسین ؟
سولطانین بو دونیادا
نه دردی ، نه غمی وار.
آخی ، نییه آتیلسین
آخی ، نییه بو توپلار؟
گلمه لر(اجنبی لر) یئرلیلری (بومیلر)
چاپیردا ، تالاییردا...
سولطان حصار ایچینده ،
میلت ایسه باییردا...
توپلاردا مورگوله ییر، ( چرت وورماق)
ائله بیل یاسا باتمیش ،
تكرلری اییلمیش ،
لوله لری پاس آتمیش ...
یادلار هجوم چكدیلر ،
یادلار دولدو شهره ،
پاسلی توپلار دینمه دی ،
آتیلمادی بیر كره (دفعه)
سولطان اؤز عالمینده ،
سولطان اؤز كئفینده دیر.
آخی ، اونا نه واركی ،
میلتی نه گونده دیر.
توپلار آتیلمادی كی ،
سولطان دیكسینه بیلر
گولله لرین سسینه
نییه زهر قاتیلسین
كیشینین نشئه سینه
یادلارین تاپداغیندا
وطن اولدو تاریمار
آخی ، نییه آتیلسین
آخی، نیییه ، بو توپلار؟
میلت اؤلور آجیندان
لوت گزیر ، عریان گزیر
اجنبی نین اؤنونده
سولطان اؤزو موریتزیر
اؤز دیلیندن ده گؤزل
بیلیر فیرنگ دیلینی
آخی پاریسده آلیب
سولطان اؤز تحصیلینی
آروادی فیرنگ قیزی
اولادی دا فیرنگدیر
بیلمیر عرب دیلینی
آخی ، نییه ده بیلسین !
بو دیل كیمه گركدیر ؟
سولطانین فیرنگیلره
چوخ بویوك حؤرمتی واردیر!
آخی نییه آتیلسین ،
آخی نییه بو توپالار؟
وطن اسیر اولوبدور
گلمه لرین(اجنبیلر) الینده
عربین اؤز ائلینده ،
مكتب فیرنگ دیلینده ،
قزئت فیرنگ دیلینده ،
علمی - نجوم یارادان
عرب دیلی بس هانی؟
قالدیرین مزاریندان
بؤیوك "ابوالوفانی"
قویون او قوجا لقمان
تاریخی واراقلاسین
هانی "مورری شعیری"
بوگونه قان آغلاسین !!
سولطان اؤز سرایندا
قولاق آسیر نغمه یه
شراب ایچیر مست اولور
"دونیا فانیدیر" دییه
اونوچون بو دونیادا
بیرقادین ، بیر شراب وار
آخی نییه آتیلسین !
آخی نییه بو توپلار!؟؟
توپلارین اوستونده كی
نیشانا باخ نیشانا
اجنبی اؤزو ساتمیش
بو توپلاری سولطانا
بو توپلار مملكتی
قوروماق اوچون دئیل
یادا(اجنبییه) ساتماق اوچونموش
یوردو وئریب اؤزگه یه
راحات یاتماق اوچونموش
بو توپلار اؤزگه لردن
قورمورموش بو یئری،
اؤز دوغما میلتیندن،
قورویور اوزگه لری.
سولطان اؤزو بختیار
گؤزلری سوزگون خومار
آخی نییه آتیلسین !
آخی نییه بو توپلار!؟؟