+0 به ین
احوالیم اولوب چوخلو پریشان قوجالیقدان
دنیا منه اولماقدادی زیندان ، قوجالیقدان
دیشلر توكولوب ، بئل بوكولوب ساچلار آغاردی
افغانه گلیب ، ناله ائدیر جان ، قوجالیقدان
از بس كی دئیندیم ائله دیم ناله و نفرین
آز قالدی گئده دین ایله ایمان ، قوجالیقدان
قار یاغدی باشا قاپ - قارا ساچلاریم آغاردی
دن دوشمه ده دیر قاشلارا هر آن ، قوجالیقدان
هر زاد گئدیب الدن منه آنجاق قالان اولدو
بیر جیققیلا ائو بیرده تكذبان ، قوجالیقدان
گنج ایللریمی یاده سالیب باده ایچنده
قالخار اؤركیمدن یئنه طوفان، قوجالیقدان
دوكتور داوانین نرخی گیران ، منده مریض حال
یارب گؤره سن نیله سین انسان ، قوجالیقدان
ائوده قالیرام بینیمه سوهان چكیر آرواد
یوخدور دئیه سن قاچماغا بیر یان ، قوجالیقدان
جانا گؤروسن! مهدی خانین (كاویانین) طبعی جاواندیر
جسمینده اگر اولسادا نقصان ، قوجالیقدان