+0 به ین
*****************
بویودویون ، دوغولدوغون وطنینده
حاق تاپدانیب شر اودولسا، وای حالینا
سخاوتین ، اونودولسا غم ایله مه
لیاقتین اونودولسا، وای حالینا
ایمضاسی وار یاسدا تویون ، تویدا یاسین
بو قوطبلر بیر- بیریندن آیریلماسین
سنه شورون باهالیغی درد اولماسین
یاغین شورلا بیر توتولسا وای حالینا
هر صوحبتین هر مجلیسده یئری دئیل
اونودماكی قوجالیرسان سن ایل به ایل
یاشیدلارین سنه گولسه ظرافت بیل
بالان یاشلی جوان گولسه ، وای حالینا
حیاتیندان گیلیله نیب چوخ آغلاما
اوتنلری ، یانا یانا واراقلاما
آرزولارین ئولمه سینه یاس ساخلاما
اینام ئولسه ، ایمان ئولسه وای حالینا
نوقصانینی ئوزه دئین نامرد دئیل
كیرایه ده یاشادیغین ائو، یورد دئیل
آنان سنه ئوگئی اولسا بیر درد دئیل
زمان سنه ئوگئی اولسا وای حالینا