ان قورخولو دوشمنیم؟

کاش بیلیدیم بونو من.

او ضربه‌ وورمامیشدان

کسیدیم یولونو من.

کیمدیر منیم

دوشمنیم؟

یاخشیمی قویوب

یامانیمی دانیشانمی؟

یوخ!

عیبلریمی دئییب

آرخامجا گولنمی؟

یوخ!..

منیم نقصانلاریمی

مندن یاخشی بیلنمی؟

یوخ! یوخ! یوخ!

اونلارین گؤزلرینی

تاخایدیم اؤز گؤزومه.

اؤزگه‌لرین گؤزویله

باخایدیم اؤز-اؤزومه.

باجارسایدیم بونو من

بو دونیادا نه دردیم...

من اوندا اؤز-اؤزومو

داها یاخشی گؤرردیم.

اوندا عیبلریمه

اؤزوم دوشمن اولاردیم؛

گؤرسیدیم اؤز-اؤزومو،

اوندا من، من اولاردیم! آه!..

منی مندن گؤزل

گؤره بیلن دوستلاریم،

آرخامجا قه-قه چکیب

منه گولن دوستلاریم،

گولون، ائله گولون کی،

چاتسین قولاقلاریما

سیزین گولوشلرینیز.

یامانیمی دانیشین،

ائله دانیشین کی سیز

من ده خبردار اولوم.

دانیشین، قویمایین کی،

من اؤزومه وورولوم.

ان قورخولو دوشمنین

گله‌رم عهده سیندن،

آنجاق اؤزوم اؤزومله

باجارا بیلمیرم من،

باجارا بیلمیرم من.

اؤزوم اؤز اللریمله

بیر گون بال ایچیرمسه،

بیر گون زهر ایچیرم.

من حیات یوللاریندان

آیاقلاریملا دئییل،

عقیده‌مله کئچیرم.