+0 به ین
محمد حسین شهریارین "حیدربابایا سلام" منظومه‌سی نشر اولدوقدان سونرا، اونو آلقیشلایان و ایلک جوابیه یازانلاردان بیریسی ده "جبار باغچه‌بان "(بیرینجی کار ولال لارا مدرسه آچان)اولموشدور. اونون شهریارا جوابیه‌سی بئله‌دیر:
علیکم السلام شهریار آقا
چوخداندی قاچمیشدین بیزدن اوزاقا
آیاق باسمازیدین بیزیم اوبایا
جوانلیق دُوروندن بوچاغا تکین
سن هئچ بیزدن، بئله یاد ائتمز یدین
نه اولدو آی اوغول، سن بیردن بیره
اونوتدوغون ائلی سالدین خاطره
چاغلایان سولارا، اسن یئللره
بو قوجا حیدره ائیله‌دین سلام،
لُطفۆن آرتیق اولسون، علیک السلام
نه قدر دادلی ایمیش سنین بو دیلین
ائشیدن کیمی بو سسینی ائلین
قوجا، جوان، اوشاق، بیرده قیز-گلین
سنی دینله‌مگه قاچدیلار چؤله
آنام قربان اولسون بو شیرین دیله
فارس قیزلاری آزدیرمیشدی عملین،
کی فارسجایدی بۆتۆن شعرین، غزلین؟
حیدر بابا یوردوندا بیر گؤزلین
عشقینه بیر قلم قویمازدین بئله،
فارسیجا یازماقدان دویمازدین بئله.
تهران گؤزللری یولون کج ائتدی
کؤنلۆنو آپاریب سنی گیج ائتدی
دئه گؤرۆم یا فلک سنله لج ائتدی؟
دؤنگه وارمیش،دؤنۆم وارمیش بیلمه‌دین،
آیریلیق وار، اؤلۆم وارمیش بیلمه‌دین.
ایندی بیزی تازه گلیب تاپیرسان
کؤنلۆمۆزه کؤزلر قویوب یاخیرسان
حسرت ایله کئچنلره باخیرسان
گؤرۆرسن کی سولار آخیر گئدیرمیش،
دوغولان قوجالیب اؤلۆب ایتیرمیش.
چوخدا وئرمه سیخینتی اؤز کؤنلۆنا
مهرباندیر هر آتا اؤز اوغلونا
قاییتمیشسان ایندی سن اؤز یولونا
بویورگینن، گؤز اۆستۆنده یئرین وار،
ائلین سنی سئوینج ایله قارشیلار.
سلام ائلر بۆتۆن ائلیمیز سنه
باغچامیز، باغیمیز، گۆلۆمۆز سنه
اوزون مودّت سوسان دیلیمیز سنه
دئه گؤره‌ک، دئمه‌لی داها نه‌یین وار
افسوس کی سن گئج دیل آچدین شهریار!
کیچیک اوشاق تزه سؤزه گلنده،
آیری بیر دادلی‌لیق اولار دیلینده.
لذّتی وار آغلایاندا، گۆلنده
ایندی کی دیل آچدین سوسما آغلا، گۆل
یامان سؤیله، یاخشی سؤیله، داغلا، گۆل!
آردینی اوخو