گزیده ی تاریخ و ادبیات آذربایجانی - AZƏRBAYCAN TARİX VƏ ƏDƏBİYYATINDAN SEÇİLMİŞLƏR

آذربایجان تاریخ و ادبیاتیندان ، سئچیلمیشلر

بختیار وهابزاده:"نئو" شعریندن بیر نئچه بیت

+0 به ین

یامان درددیر ،

اؤزگه سینه یاماق اولماق

یامان دردیر ،

آزادلیقین حسرتینه

داماق اولماق

یامان دردیر،

گوزون اولا

آمما گؤره بیلمه یه سن

یامان دردیر ،

الین اولا،

ائوینده كی زیر- زیبیلی 

سن سوپوره بیلمه یه سن

یامان دردیر ،

دیلین اولا ،

نه دانیشب نه دینه سن

یامان درددیر،

عاغلین اولا ،

اؤزگه سینین عاغلی ایله

دوشونه سن

......



آردینی اوخو

حمید آرش آزاد: خیاباندا

+0 به ین

بیر وقت، گزه‌نده بو گؤزه‌ل یار خیابان‌دا

بیر سَروِ خُرامان‌ایدی، سیّار خیابان‌دا

 ایندی اگیلیب قامتی من تك، گؤزو گؤرمور

ال‌ده عصا، گزمك‌ده‌دیر آخسار خیابان‌دا

 اوْندا دوْلاشاردیق كی، گؤره‌ك «تئریا» هایاندا؟

ایندی باخیریق، هاردا «مطب» وار خیابان‌دا؟!

 چكدیك خیابان‌لاركی، جوان‌لار ائده جؤولان

جؤولان ائله‌ییر ایندی سیچان‌لار خیابان‌دا

باخ توستویه، توْز- توْرپاغا، هم سس- كویو دینله

مین‌لرله ماشین وار بو كیچیك – دار خیابان‌دا

 لندن- نیویورك، اللی دنه «بورس» ساتانمیر

میلیون‌لا گزیر بوردا خریدار خیابان‌دا

 «بورس» آل- وئرینی بوْشلا، «سهام» دان‌دا گؤزون اؤرت

عرضه ائله میلیون قوطو سیگار خیابان‌دا

 كئچدی اوْ زمان‌كی، لوْطولار بوردا گزه‌ردی

جؤولان ائدیری ایندی گؤزه‌ل یار خیابان‌دا

 دلبر، یانینا خارجی- خیردا «تولا» سالمیش

نازلا دوْلانیر، ال‌ده‌ده اوْوسار، خیابان‌دا

 ایت‌لرده اوْلوب قرتی، بالا قوْلچاغا بنزه‌ر

گاهدان‌دا چكیر توك‌لره سشوار خیابان‌دا

 بیردن گؤروروك جدّی- درین بحث‌لر اوْلدو

چوْخ معنالی، حكمت‌لی‌دیر افكار خیابان‌دا

 بیر عدّه سئویر یاز- یایی، مانتو یاشیل اوْلسون

بعضی سؤله‌ییر: «چك اوجا دیوار خیابان‌دا»!

 یوزمین یولون اوْلسا، یانینا سال ایكی یوز «گارد»

چون‌كی، موْتور اوستده گزیر اشرار خیابان‌دا

 آچمیش بساطین دستفروش‌لار، نئچه مین جور

وار فرش ساتان، فالچی، هم عطار خیابان‌دا

 «آرش»! سؤزو كس، تئزجه اكیل، اوْرتادا دورما

گؤردون یاخانی توتدو طلبكار خیابان‌دا