دیشلریم توكولدو، ساچیم آغاردی،   

یاشین نه گوناهی، یاش بهانه دیر.

طالعیم داش آتدی، باشیمی یاردی،

بونا داش نیله سین، داش بهانه دیر.

بعضن باهاردا  دا  سارالیر یارپاق،

طالعین الینده ، هر شئی اویونجاق،

انسانی  ئولدورن  اجلدیر آنجاق،

آزاردا، بزاردا،  بوش بهانه دیر.

لاغ ائتمه بدبخته، گولمه ناكاما،

بدبخت جان آتماقلا، یتیشمزكاما،

بختیمدن قار یاغدی عمر باغچاما،

بونا قیش نیله سین، قیش بهانه دیر.

من قوزیئلی اولدوم، آرزوم گونیلی،

اونا چاتاممادیم، چالیشدیم خیلی،

بختیار، بختیندن اولدون گیلئیلی،

بودا سنین اوچون خوش بهانه دیر